Rayonun Heydər Əliyev adına Meydanında xalqımızın ən gözəl bayramı olan, özündə milli-mənəvi dəyərləri, eləcə də xeyirxahlıq, birlik və həmrəylik kimi gözəl ənənələri əks etdirən Novruz bayramı münasibətilə ümumrayon tədbiri keçirilib.
           Tədbirdə rayon İcra hakimiyyətinin başçısı Sevindik Hətəmov, hüquq-mühafizə orqanlarının rəhbərləri, idarə, müəssisə, təşkilatların kollektivləri və rayon ictimaiyyətinin nümayəndələri iştirak edib.
           Rayon İcra hakimiyyətinin  başçısı Sevindik Hətəmov bayram tədbirində çıxış edərək min illər boyu xalqımız tərəfindən qeyd edilən milli birlik və həmrəylik rəmzi olan müqəddəs Novruz bayramı münasibəti ilə bütün qonaqları və rayon əhalisini təbrik etmiş, hər bir ailəyə ruzi, bərəkət, bol sevinc arzulamışdır. Bayram tonqalı rayon İcra hakimiyyətinin başçısı tərəfindən alovlandırılıb.
        Tədbirdə rayon rəhbərliyi, təhsil işçiləri, rayon ictimaiyyəti və qonaqlar meydanda təşkil edilmiş xalq tətbiqi sənət nümunələrindən ibarət sərgilərə, cəngi sədaları altında idmançıların rəngarəng çıxışlarına baxmış, rayonun milli mətbəx və folklor nümunələri ilə tanış  olmuşlar.   Meydana Novruzun personajları olan Kosa və Keçəlin daxil olması alqışlarla qarşılanmışdır. Ulu Dədə Qorqud və Bahar qızı qəlblərə sevinc, fərəh və təravət gətirən Novruz bayramı münasibətilə rayon sakinlərini təbrik etmişdir.
        Bayram tədbiri rayon mədəniyyət və incəsənət ustalarının, rəqqasların rəngarəng  konsert proqramları ilə davam etdirilib.